青少年主日禮拜的禱告詞

阮的父上帝，佇七日的頭一日，也是祢所分別作聖的日子，同信的眾兄弟姐妹，同心聚集佇祢的殿院虔誠敬拜服事祢。此時，阮求主赦免阮佇此一禮拜中所做得罪祢的事，擦消阮無意中所犯的罪過，互阮及主相和。互阮口母（m）若用嘴謳咾祢，也用心倚靠祢，用靈魂敬拜祢。
   
主啊，祢佇聖經內面教示阮講:「無得因為你的少年，互人看輕，著佇講話、佇行做、佇仁愛、佇信、佇清氣，做信的人的模樣。」 是阿，主！阮感謝祢在阮猶少年的時就揀選阮，互阮有份參與佇青少年事工的服事。佇服事中，阮學習肢體的互相扶持，體貼彼此的軟弱及欣賞別人的優點。  口母（m）若按呢，也互阮佇服事中，深深體會敬畏上帝就是智慧的根本。今仔日，教會舉行青少年主日的禮拜，對頭到尾，阮攏願意謙卑順服聖神的引導，將一切的榮光歸互至高的主上帝。
   
此時，阮決志盡趁阮年輕的時陣，欲互主祢作差用。無論佇家庭、佇學校、佇社會及佇教會，佇任何所在，攏會通過阮的好所行，來干證主祢的名。祈禱奉靠主耶穌的聖名求，阿們。

〈這份禱告詞用於2006.8.13.青少年主日禮拜當中）