祈禱文：感謝主的疼及老母的疼

祈禱文──齊讀：感謝主的疼及老母的疼

疼阮的父上帝，感謝謳咾祢，因為祢是全能的主，當阮佇母胎的內面，就已經經歷祢的工作，親像詩篇一三九篇15-16節所記載講：「我佇暗中受造……彼時，我的形體無隱瞞佇祢，我未成形的體質，祢的目睭已經看見，所定著的日，猶未有一日，攏記佇祢的冊。」當阮猶佇母胎的內面，祢就互阮經驗老母的疼的滋味，通過老母的疼，祢互阮體會祢疼的偉大及無停息。感謝父上帝，祢將耶穌基督出世、受苦、受死、閣活的好消息賞賜互老母，祢將信仰的奧妙真理通過老母傳互阮。謳咾我主，因為祢佇逐世代及老母佇在。感謝我主，因為祢創造阮、拯救阮，閣保守阮所有的一切，對世間的開始到路尾。祈禱靠主耶穌名求，阿們。

〈本祈禱文在2010.5.9.母親節感恩禮拜中會眾禱告用〉